URDUN OO XABSIGA DHIGTAY 16-QOF OO LOO HAYSTO INEY…
(SAWIRKA)-RAG LOO SOO XIRAY AMNI DARRO.
(AMMAN)-Sirdoonka Urdun ayaa Talaadada maanta ah ku dhawaaqay in la xiray 16 qof oo lagu eedeyay iney qorsheynayeen iney beegsadaan Amniga Qaranka ayna abuuraan “Qalalaase”, sida ey sheegtay Warbaahinta dowladda. "Waaxda Sirdoonka Guud ee Jordan (GID) waxay fashilisay qorshayaal lagu bartilmaameedsanayay Amniga Qaranka, lagu beeray fowdo, iyo wax u dhimis gudaha Urdun," ayay sheegtay Wakaaladda Wararka ee Petra. "GID-du waxay xiray 16 tuhmane ka dib kormeer sirdoon oo dhow ilaa 2021," ayay raacisay. Waxa ey sheegtay in tuhmanayaasha loo xiray "Samaynta Gantaallada iyagoo isticmaalaya qalab maxalli ah iyo sidoo kale agabka loo soo dhoofiyo arrimo sharci darro ah, haysashada Walxaha Qarxa iyo hubka, qarinta Gantaal diyaar u ah in la geeyo, qorsheynta samaynta diyaaradaha aan duuliyaha lahayn, iyo qoritaanka iyo tababarida shaqaale ee Jordan iyo sidoo kale tababaro dibadda ah." Kiiska ayaa loo gudbiyay Maxkamadda Amniga ee Gobolka, ayuu Petra hadalkiisa ku daray. Faah faahin kale lama helin isla markiiba. Ra’iisul Wasaaraha Lubnaan Nawaf Salaam ayaa u sheegay dhigiisa Jordan Talaadada in Beirut ay diyaar u tahay iney gacan ka geysato baaritaan kasta oo la xiriira qorshaha la fashiliyay, ka dib markii ay soo baxeen warar sheegaya in qaar ka mid ah dadka la xiray ay tababar ku soo qaateen Lubnaan. "Ra'iisul Wasaare Salam wuxuu carabka ku adkeeyay in Lubnaan ey diido iney saldhig u noqoto ama ey soo bandhigto tallaabo kasta oo khatar gelinaysa Maanka waddan kasta oo walaalo ah ama saaxiib ah," ayaa lagu yiri bayaan ka soo baxay Xafiiska Ra'iisul Wasaaraha. Urdun waxa ey ku naaloonaysaa xasillooni marka loo eego dalalka kale ee Gobolka, laakiin waxa ey hore ugu dhawaaqday in la xiray sababo la xiriirta Ammaanka Qaranka. Bishii May ee sannadkii hore, laamaha ammaanku waxay fashiliyeen isku day ey maleeshiyad shisheeye ah oo ey dawladdu taageerto ku doonayeen iney hub ugu soo geliyaan qol ku yaalla gudaha boqortooyada, sida uu sarkaalku sheegay xilligaas.
ISHA AL-CARABIYA.
