MARAYKANKA OO SI JOOGTA AH U WEERARARA XUUT..
(SAWIRKA)-GENTAALADA MARAYKANKA.
(WASHINGTON)-Mareykanka ayaa duqeeyay in ka badan 100 bartilmaameed oo ku yaala goobaha ay Xuutiyiinta ka taliyaan ee dalka Yemen tan iyo markii uu bilowday wajigii u dambeeyay ee ololihiisa cirka ee ka dhanka ah maleeshiyada ay Iran taageerto bishii hore, sida uu Arbacada maanta ah sheegay sarkaal ka tirsan difaaca Mareykanka. Ciidamada Mareykanka ayaa ku garaacay Xuutiyiinta duqeymo ku dhow maalin kasta tan iyo 15-kii bishii Maarso si ay u soo afjaraan khatarta ay Xuutiyiintu ku hayaan maraakiibta rayidka iyo maraakiibta militariga ee ku sugan Badda Cas iyo Gacanka Cadmeed. “Maraykanku waxa uu duqeeyey in ka badan 100 bartilmaameed oo ay Xuutiyiintu maamulaan ee Gudaha dalka Yemen,” ayuu yiri sarkaalka difaaca oo ka jawaabayey su’aal ku saabsan tirada duqeymaha Mareykanka tan iyo bartamihii bishii Maarso. “Waxaan burburinay xarumihii taliska iyo kantaroolka, xarumihii hubka lagu farsameyn jiray, iyo goobihii hore ee hubka lagu keydin jiray,” ayuu yiri sarkaalkan oo magaciisa qariyay.
In kasta oo duqeymahan, Xuutiyiinta oo gacanta ku haya dhul badan oo Yemen ah oo dagaal kula jira dowladda caalamku aqoonsan yahay tan iyo 2015-kii ayaa sii waday sheegashada weerarada ka dhanka ah maraakiibta Mareykanka iyo Israa'iil.
Mintidiinta ayaa bilaabay beegsiga maraakiibta dabayaaqadii 2023, iyaga oo ku andacoonaya iney garab taagan yihiin Falastiiniyiinta ku sugan Marinka Qaza, oo ay burburisay olole militari oo ay bilowday Israel ka dib weerar Xamaas ay fulisay bishii October ee sanadkaas.
Weerarada Xuutiyiinta ayaa ka horjoogsaday maraakiibta inay maraan kanaalka Suweys oo ah waddo muhiim ah oo sida caadiga ah qaada qiyaastii 12 boqolkiiba taraafikada maraakiibta adduunka taasoo ku qasabtay shirkado badan inay u leexdaan dhanka cirifka koonfureed ee Afrika. Mareykanka ayaa markii ugu horeysay bilaabay duqeymaha ka dhanka ah Xuutiyiinta ee maamulka Biden, waxaanu Madaxweyne Donald Trump uu todobaadkii hore wacad ku maray in tilaabada militari ee ka dhanka ah maleeshiyada ay sii socon doonto ilaa inta aysan khatar ku ahayn maraakiibta.
"Doorashada Xuuthiyiinta waa caddahay: Jooji toogashada maraakiibta Mareykanka, waan joojineynaa xabbadda aad ku haysaan, haddii kale, hadda uun baan bilownay, xanuunka dhabta ahna weli waa soo socdaa, labadaba Xuutiyiinta iyo kuwa kafaala qaada ee Iran," ayuu Trump ku yiri bartiisa bulshada ee runta ah.
ISHA-ARAB NEWS.
