KULANKA SOOMAALIYA IYO ITOOBIYA EE MUQDISHO.

(SAWIRKA)-KULANKA MADAXTOOYADA.

(MUQDISHO)-Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa xarunta Madaxtooyada Soomaaliya kula yeeshay kulan gaar ah Reysal Wasaaraha Jamhuuriyadda Federaalka Dimuqraadiga Itoobiya Mudane Abiy Axmed oo safar shaqo ku yimid dalka. Kulanka Madaxweynaha iyo Reysal Wasaaraha ayaa diiradda lagu saaray Xoojinta Iskaashiga dhinacyada Amniga, dhaqaalaha iyo Arrimaha Bulshada, iyagoo adkeeyay xiriirka taariikhiga ah iyo derisnimada soo jireenka ah ee labada shacab oo ey aasaas u tahay is-ixtiraam Qarannimo iyo ka dheeraanta Faro-gelinta Arrimaha Gudaha dal kasta. Madaxweynaha Jamhuuriyadda Federaalka Soomaaliya iyo Raysal Wasaaraha Jamhuuriyadda Ethiopia ayaa wadajir u soo dhaweeyay Is-afgaradka ey gaareen Taliyeyaasha Ciidamada Qaranka Soomaaliya (SNA) iyo Ciidamada Difaaca Ethiopia (ENDF), kaas oo lagu xoojinayo Amniga iyo Xasilloonida Gobolka, waxa eyna bogaadiyeen billowga wadahadallada Farsamo ee ka socda Ankara oo muujiyey sida ey labada dal uga go'an tahay wada-hadal wax-ku-ool ah iyo iskaashi mirodhal ah. Raysal Wasaaraha Jamhuuriyadda Federaalka Itoobiya Mudane Abiy Axmed ayaa uga mahad celiyey Dowladda iyo shacabka Soomaaliya soo dhaweynta diirran ee ey ku qaabileen isaga iyo wafdigiisa, waxa uuna adkeeyey mudnaanta uu dalkiisu siinayo xiriirka labo-geesoodka ah ee kala dhexeeya Soomaaliya, si ka tarjumaysa danaha labada dal iyo Xasilloonida Gobolka. Madaxweynaha Jamhuuriyadda Mudane Xasan Sheekh Maxamuud oo ku bogaadiyey Reysal Abiy Axmed booqashada uu ku yimid dalka iyo wadahadallada mirodhalka ah ee ey ku yeesheen Villa Soomaaliya ayaa ku celiyey aragtida soo jireenka ah ee ey ku dhisan tahay Diblumaasiyadda Soomaaliya ee ilaalinta daris wanaagga, Is-ixtiraamka Qarannimo iyo in aan cidna laga aqbalayn ku Xadgudubka Midnimada iyo Wadajirka shacabka iyo Jamhuuriyadda Federaalka Soomaaliya.

ISHA-VILLA SOMALIA.