GOLAHA SHACABKA OO ANSIXIYEY DHAWR SHARCI.

(SAWIRKA)-GOLAHA SHACABKA EE BJFS.

(MUQDISHO)-Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa Kalfafhiga Lixaad Kulankiisa 7-aad ku yeeshay Xarunta Golaha Shacabka, waxaana Shir Guddoominayay Guddoomiyaha Golaha Shacabka ee Baarlamaanka JFS Mudane Sheekh Aadan Maxamed Nuur (Madoobe) oo uu wehliyo Guddoomiye Ku-Xigeenka Labaad ee Golaha Shacabka Mudane Cabdullaahi Cumar Abshirow. Guntanka ama kooramka kulanka oo ku furmay 143-Xildhibaan ayaa Ajendihiisa waxa uu ahaa Akhrinta Sedaxaad iyo u Codeynta Hindise Sharciyeedka Sharciga Hay’adaha Maaliyadda, Akhrinta Sedaxaad iyo u Codeynta Hindise Sharciyeedka Shirkadaha Caymiska iyo Akhrinta Sedaxaad iyo u Codeynta Sharciga wax ka bedelka Sharciga Ka-hortaga Lacag dhaqida iyo Maalgelinta Argagixisada. Ugu horeyn Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa Ansixiyay Sharciga wax ka bedelka Sharciga ka hortaga lacag dhaqida iyo Maalgelinta Argagixisada, waxaana ogolaatay 141-Xildhibaan laba Xildhibaanna waa ey ka aamustay. Sidoo kale Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa Ansixiyay Hindise Sharciyeedka Sharciga Hay’adaha Maaliyadda, waxaana ogolaatay 142, hal Xildhibaanna waa uu ka aamusay. Ugu dambeyn Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa Ansixiyay Hindise Sharciyeedka Shirkadaha Caymiska, waxaana ogolaatay 142-Xildhibaan, hal Xildhibaan ayaa diiday wax ka aamusay ma jirin. Wasiirka Wasaaradda Maaliyadda ee Xukuumadda Federaalka Soomaaliya Mudane Biixi Iimaan Cige ayaa Xildhibaanadda Golaha Shacabka uga Mahadceliyay Ansixinta Hindise Sharciyeedyadan oo uu sheegay iney muhiim u yihiin Horumarinta Nidaamka Maaliyadeed ee dalka. Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) oo kulanka soo xiray ayaa xildhibaanadda Golaha Shacabka ku bogaadiyay shaqada ey Qaranka u hayaan, waxa uuna sheegay in kulamada guud ee Golaha la hakiyay inta ka dhiman bisha barakeysan ee Ramadaan.

ISHA-SNTV.

Previous
Previous

MIDAWGA YURUB IYO MARAYKANKA MAXAY ISKU HAYAAN?

Next
Next

IGAD OO QABANEYSA SHIR AAN CAADI AHAYN.