NETANYAHU OO RABA INU SHAQADA KA ERYO…
(SAWIRKA)-NETANYAHU.
(TEL AVIV)-Ra’iisul Wasaaraha Israa’iil Benjamin Netanyahu ayaa go’aansaday inuu xilka ka qaado Ronen Bar oo ahaa Madaxa Hay’adda Amniga Gudaha ee Shin Bet, waxaanu Golaha Wasiirrada u codsan doonaa Ansixinta tallaabadan toddobaadkan, sida lagu sheegay bayaan ka soo baxay Xafiiska Ra’iisul Wasaaraha.
Maxay muhiim u tahay: Ma jirto dowlad weligeed shaqada ka ceyrisay Madaxa Hay'adda Shin Bet, oo ah Hay'adda ugu awoodda badan Ammaanka Israa'iil. Go’aanka Netanyahu ayaa imaanaya iyadoo Hay’addu ey baaritaan ku waddo labo ka mid ah Lataliyayaashiisa oo lagu eedeeyay iney lacago ka heleen dalka Qatar intii uu socday dagaalkii Israa’iil iyo Xamaas .
Talaabadan la filayey ee Netanyahu ayaa waxa ey walaac ka muujiyey Cadawgiisa Siyaasadeed ee ah inuu Bar ku badali doono nin daacad u ah, Siyaasadeyn doono Ururka, isla markaana uu hubayn karo kuwa siyaasad ahaan kasoo horjeeda iyo kuwa dhaliila, ama in uu ka hortago dhaq-dhaqaaqa Mudaharaadka ee isaga ka dhanka ah.
Bar ayaa ka jawaabay warkan isagoo dhaleeceeyay "Rajada Netanyahu ee daacadnimada shakhsi ahaaneed" taas oo uu sheegay iney ku xad gudubtay danta guud iyo sharciyada iyo qiyamka ey ku shaqeyso Hay'addiisu.
Sawirka weyn : Iyadoo Ra'iisul Wasaaruhu magacaabay Madaxa Shin Bet, Golaha Wasiiraduna ey Ansixiyaan xulashada, Hay'adda ayaa muddo dheer loo arkay iney tahay mid Siyaasadaysan. Waajibaadkeeda waxaa ka mid ah ilaalinta Hay'adaha Dimuqraadiga ah ee Israa'iil.
Netanyahu ayaa loo haystaa saddex kiis oo ah Laaluush, khiyaamo iyo kalsooni darro.
Waxa uu sidoo kale bilaabay in uu qaado tillaabooyin uu xilka kaga qaadayo Xeer Ilaaliyaha Guud ee loo xilsaaray inuu Dacwad ku soo Oogo.
Kaaliyeyaasha Netanyahu ayaa sheegay inuu ku dhiiri geliyay sida uu Madaxweyne Trump uga sifaynayo "Dawlad qoto dheer" iyo go'aankii uu ku magacaabay kuwa daacad u ah dhammaan jagooyinka muhiimka ah.
Muuqaalka Gadaashiisa: Netanyahu wuxuu ku cadaadinayey Baarka dhowr toddobaad inuu iscasilo. Bar ayaa diiday oo u sheegay Netanyahu inuu eryi karo haddii uu rabo, sarkaal Israa'iil ah ayaa u sheegay Axios.
Daacadayaasha Netanyahu ee Saxaafada Israel iyo Baraha Bulshada ayaa si cad u weeraray Bar, kaasoo labaatan sano ku qaatay Shin Bet ka hor inta aan loo magacaabin Agaasimaha 2021.
Xulafada Netanyahu ayaa ku andacoonaya in Madaxa Sirdoonka uu ka shaqeynayo sidii uu u wiiqi lahaa Ra'iisul Wasaaraha sababo Siyaasadeed awgood.
Qoraalkiisa, Bar wuxuu ku sheegay inuu Netanyahu u sheegay inuu hayo "baaritaanno xasaasi ah oo dhowr ah" si loo dhammeeyo, iyo sidoo kale soo saarista la Haystayaasha Israa'iil ee haray, ka hor inta uusan u bandhigin Ra'iisul Wasaaraha inuu is-casilo oo uu u soo bandhigo laba Murashax oo Gudaha ah si ey isaga u beddelaan. Waxa uu sheegay inuu wali ku tala jiro in uu dhameystiro howlahaas ka hor inta uusan xilka wareejin.
Wadista warka: Dhowr toddobaad ka hor, iyadoo ogolaanshaha Xeer ilaaliyaha Guud, Shin Bet ey furtay baaritaan lagu sameeyay saddex ka mid ah La-taliyeyaasha Netanyahu oo lagu eedeeyay iney xiriir la sameeyeen dalka Qatar.
Baaritaanka oo loogu magac daray "Qatar-Gate" ee saxaafadda Israel, ayaa diiradda lagu saaray lacago la sheegay in La-taliyeyaasha Netanyahu ey fududeeyeen oo ey ka heleen Qatar si ey uga shaqeeyaan Horumarinta Sumcadda waddanka ee Israel.
Qatar waa mid ka mid ah dhexdhexaadiyeyaasha muhiimka ah ee Qasa la Haystayaasha iyo heshiiska xabbad joojinta . Laakiin go'aankii Netanyahu ee 2018 uu ku weydiistay Qatar iney lacag ugu xawisho Xamaas ee Gaza sababo bini'aadantinimo waxay noqotay mid ka mid ah qodobbada ugu muhiimsan ee dhaleeceynta isaga ka dib weerarkii Oct. 7.
Shin Bet ayaa go'aamisay qayb ka mid ah lacagtaas oo ku baxday dhisitaanka militariga Hamas.
Inta u dhexaysa khadadka: Bar iyo Netanyahu labaduba waxay la kulmeen dhaleeceyn ku saabsan fashilka Sirdoonka ee u oggolaaday weerarka Oct. 7.
Barku waxay si cad iyo si gaar ahba u xil saartay fashilka dhacay, waxaanay ku baaqday in guddi heer Qaran ah loo saaro arrintan.
Netanyahu ayaa is hortaag ku sameeyay dhismaha guddigan oo kale, isagoo ku dooday iney noqon doonto mid Siyaasadeysan, wuxuuna diiday inuu wax mas’uuliyad ah iska saaro.
Bar ayaa tilmaamay inuu is casili doono marka dhammaan la Haystayaasha Israa’iil laga soo celiyo Qaza, wuxuuna door muhiim ah ku lahaa wada xaajoodka la haystayaasha ilaa bishii hore, markaasoo Netanyahu uu ka saaray wadahadallada.
Waxa ay leeyihiin: Bayaan uu soo saaray Axaddii, Netanyahu wuxuu ku andacooday inuu u dhaqaaqayo inuu shaqada ka ceyriyo agaasimaha Shin Bet sababtoo ah "kalsooni la'aanta socota iyo sii kordheysa."
"Waxaan Aaminsanahay in tallaabadani ey muhiim u tahay dib u habeynta Ururka, gaarista ujeedooyinka dagaalka iyo ka hortagga musiibada soo socota," ayuu yiri Netanyahu.
Kii u dambeeyay: Xeer Ilaaliyaha guud ee Israa'iil ayaa warqad uu Axaddii u diray Netanyahu kula taliyay inuusan shaqada ka cayrin karin Bar sababtoo ah "waxaa jira walaac go'aankani uu yahay mid sharci-darro ah oo uu ka dhashay iskahorimaadka danaha."
Netanyahu iyo Golihiisa Wasiiradu waxay u badan tahay iney iska indhatiraan diidmadaas, in kasta oo go'aanku uu ugu dambeyntii iman karo Maxkamadda sare.
Dib-u-dhac: In kasta oo Bar uu noqon doono Madaxii ugu horeeyay ee Shin Bet ee la eryo, laba Hoggaamiye oo hore ayaa is casilay, oo uu ku jiro Madixii Hay'adda markii la dilay Ra'iisul Wasaare Yitzhak Rabin 1995-kii.
ISHA-AXIOS.
